Ad Deen Al Islam

Hum ne yeh kitaab tumhari taraf nazil ki hai taa keh tum Allah ki ikhlas ke sath bandagi karo aur deen ko sirf usi ke liye khaalis rakho.

(Qur’an 39:1)

Allah ne behtareen hadees nazil farmayi hai — aik aisi kitaab jo apne mazmoon mein hum ahang hai aur baar baar dohrayi jati hai. Is se un logon ke rongte kharay ho jate hain jo apne Rab se darte hain, phir un ke dil aur jism Allah ke zikr ki taraf narm ho jate hain. Yehi Allah ki hidayat hai, jisse woh jise chahta hai hidayat deta hai, aur jise gumraah chhor de, us ke liye koi rehnuma nahi.

(39:23)

Hum ne yeh kitaab tumhari taraf tamam insaanon ki bhalai ke liye nazil ki hai. Jo is par chale ga, woh apne faide ke liye chale ga, aur jo is se munh moray ga, woh apna hi nuksaan kare ga. Aur ae Nabi ﷺ! Aap un par nigran muqarrar nahi kiye gaye.

(39:41)

Yeh ayat Surah Az-Zumar (39) se hain, jin mein bilkul wazeh taur par bataya gaya hai ke yeh kitaab (Qur’an) Allah ki taraf se tamam insaniyat ki hidayat ke liye nazil hui hai. Jo chahe is se hidayat le, aur jo gumraahi ikhtiyar kare, us ka zimma Rasool ﷺ par nahi.

Qur’an mein bar bar bayan hua hai ke Rasool ﷺ sirf wahi ki pairwi karte thay jo un par nazil ki jati thi:

Surah Al-An‘am (6:50)

Surah Al-A‘raf (7:203)

Surah Yunus (10:15)

Surah Al-Ahqaf (46:9)

Is se wazeh hota hai ke deen ke tamam ahkaam Qur’an mein Allah ne bayan farma diye, aur Rasool ﷺ ne sirf unhi ki pairwi ki. Yehi hukum tamam momineen ke liye hai ke woh sirf is kitaab ki pairwi karein — jo behtareen hadees hai, jis ka rawi khud Allah hai aur jisay pohanchanay walay Allah ke aakhri Rasool Muhammad ﷺ hain.

Surah Al-Qamar (54:17, 22, 32, 40) mein Allah bar bar farmata hai ke hum ne Qur’an ko samajhne ke liye aasaan bana diya hai, phir bhi kya koi hai jo naseehat hasil kare?

Yeh tamheed is liye hai taa keh har aqalmand aur baaligh apni aqal aur shaoor se faisla kare ke Qur’an Allah ki aakhri hidayat ki kitaab hai, jo poori insaniyat ki bhalai ke liye nazil hui hai. Is ki ayat bilkul wazeh, asaan aur roshan hain. Ek ayat doosri ayat ki wazahat karti hai. Isi liye Allah ne farmaya: “Yeh woh kitaab hai jismein koi shak nahi.”

Allah ne is kalaam ko behtareen hadees qarar diya aur challenge diya ke agar tum shak mein ho to is jaisi aik soorat bana kar lao.

Afsos ke is kitaab ke warison ne bhi wahi rawaiya ikhtiyar kiya jo pehle ummaton ne kiya: Allah ke kalaam mein apni baatein mila kar unhein anbiyah aur rasoolon ki taraf mansoob kar diya. Chunke Qur’an ki hifazat ki zimmedari khud Allah ne li, is liye dushman is mein tabdeeli na kar sakay, to unhon ne hadees ke naam par riwayaat ki kitaabein bana kar Qur’an ke muqaabil khara kar diya.

Is tarah Deen-e-Islam bigar kar mazhab ban gaya, aur mazhab firqon mein taqseem ho gaya. Aaj Muslim ummat ka zawaal isi firqa bandi ki wajah se hai.

Adam se le kar Muhammad ﷺ tak Allah ne sirf aik deen diya — Deen-e-Islam — jo poori insaniyat ki bhalai ke liye hai. Mazahib insaan ko taqseem karte hain jabke deen insaniyat ko jorta hai. Isi liye Allah ne hukm diya:

“Allah ki rassi (Qur’an) ko mazbooti se thaam lo aur firqon mein na bato.”

(Aal-e-Imran 3:103)

Ramadan woh mubarak mahina hai jismein Qur’an nazil hua taa keh insaan haq aur baatil mein farq kar sake. Magar afsos ke is mahine ka aghaaz hi firqa bandi se hota hai. Chand dekhne par ikhtilaf, committee, aur tanaza — halanke Qur’an wazeh karta hai ke Allah ne chand ki manzilein muqarrar kar di hain taa keh waqt aur saalon ka hisaab ho sake (10:5), ya‘ni aik munazzam calendar ban sakta hai.

Jab Musalman Qur’an par chaltay thay to Arab se nikal kar duniya ki qiyadat karte thay, lekin jab Qur’an chhor kar riwayaat par chalay to zawaal muqaddar ban gaya.

Aaj Musalman har jagah zillat ka shikar hain, jabke woh qaumein taraqqi kar rahi hain jo Allah ke usoolon ko apnati hain — chahe woh Musalman hon ya na hon.

Allah humein taufeeq de ke hum Qur’an ko samjhein, us par ghour karein, aur use apni zindagi ka rehnuma banayein, na ke riwayaat ki zanjeeron mein qaid kar dein. Jaisa ke Rasool ﷺ qiyamat ke din shikayat karein ge:

“Ae mere Rab! Be-shak meri qaum ne is Qur’an ko chhor diya tha.”

(Al-Furqan 25:30)

Allah humein Qur’an par amal kar ke apni duniya aur aakhirat dono ko behtar banane ki taufeeq ata farmaye.